الجمعة، 28 أكتوبر، 2011

أيوه خايفه



وتسألنى حبيبى ليه .. ؟

هو انتى خايفه ليه ..؟

ايوه  قلبى لسه خايف

بيحضن الروح

 بالشفايف

خايفه الاقى

 نفسى جنبك 

وانت ناسى

 لنبض قلبك

تنسى حتى

 تقول بحبك

وانت كل جنان هوايا

عايشه بيك احلام صبايا

نجمه طايره بشوق تغنى

واخده روحى وغصب عنى

بفتكر كلمه وجميله

قلتهالى

 ف يوم وليله

غيرت نسمة هوايا

لونت حرفى فى لغايا

ذوقت فرحه 

 ف يوم بُكايا


ورده حلوه

 تقول هاتولى
نبضة الحب لعيونى
كل خطوه امشيها  جنبك

قربت نبضى  لقلبك

كل لحظه معاك تخلى 

شوقى ليك 

عصفور يغنى

كل كلمه

 ف قلبى تطرح

غصن هادى

 يقول ويسرح

ايوه خايفه يجينى يوم

يملى قلبى سٌهاد ولوم

تنسى سهرى

 وانت غايب

تنسى كلمه

 لقلب دايب 

قال بحبك وانت وحدك

تملك الشوق والحقايق

وبتسالنى وتانى ليه ؟

خايفه برضو لسه ليه ؟

ايوه طبعا

 كُلى خايف 

وهحضن الروح

 بالشفايف

 لحد روحى معاك

 ما ترسى

 ماانت لقلبى

طوق و مرسى




السبت، 22 أكتوبر، 2011

عزف الصمت





وليه الصبر لما نعوزه يتبدد

وليه الحزن لما يجينا يتبغدد

انا همى ف جوايا


وما قدرتش فى 


يوم أمحيه 

ابوح بالاهه تستنى

ولا شوقى عرفت

اداريه

جروح القلب ويايا

 هموم توجع

اشد الدمعه من عينى

اهات تلسع

بتجرح خد متورد

 مالوش مرتع

ياروح القلب جوايا

 بتخنقنى

 تعذب اهه ف سمايا

بتعشقنى

 بتحنى ف ضهرى

 وتفوتنى

ادوب ف الامى

وبتفتت انا وحدى

 اشوف البُعد بيقرب

 ولا يعدى

بيخطف منى ضحكايه

 بترسمنى

يخلى الذكرى تسرحبى

و تغدربى

ألملم ف جراحى حزين

اقـول يمكـن تصبرنـى

 تقـول مسكيـن

أشـوف العتمـة بيـن جرحـى

 تهـد الحيـل

 وبأصـرخ وكـل صـراخـى

صبـر وويـل

أأهـين يازمـن قاسـى

 واه ياصبـر كـان راسـى

تعـالى وغيـر الاحـوال

ولا تسيبـى بأحزانـى

اقـول وحـدى هنـا مـوال

ويفضـل عمـرى متحيــر

ما بيـن غربـة وبيـن ترحـال

*******************************************************

السبت، 15 أكتوبر، 2011

حد السكات



حد السكات
لما صدمنا شدنا
ساعه ما بان
 صوت اللئام
من بين ولادنا
 ف الميدان
  زود بسرعه همنا
حتى الجراح المرة
عدت ف الطريق
جرحت ف ايدنا 
وصابت بالغدر
 برضو
 100صديق

لكن دماء الشهدا
عيشه ف دمنا
 وبتقولنا
ماتحسبوش الدم
 دا ابدا رخيص
دم العزيز الحر 
صرخة للخسيس
انا دمى مش هيهون
وربى هو مقدرة
 عايش معاكم وزهرى
 زاينه مخضرة
مهما يكون الغدر
لسه له جناح
مسير بالصبر
 بكره
هنهده ونكسره
اما الامل هيطُولنا يوم
احنا اللى بادينا
هنشده و نعمره
يابن البلد دى
 اوعاك تقول
خلاص دى  ثورة 
 اتبخرت
بعدت خلاص
أما هٍممنا
هزيله اتبعترت

لا دا احنا 
 شعب عايشها
وبالحلال
 مستنى بكرة 
بشمس وهتشرق
بالمحبه و بالجلال


كل الكلام المُر
 مَر من هنا
 شايفينه دايما
 ف الطريق
 هَل ونما
لما السكات 
قرب بسرعه ولمنا
والغدر مشواره
 طويل ما يهزنا
والدمعه ف عنينا تبوح
بس الثبات غير السكات
يمكن بفرحه يلمنا
يمكن بفرحه يلمنا





الأحد، 9 أكتوبر، 2011

دمعه حنين





اشجان وف لحظة بتسرقنى

بتعذب فيا وتحرقنى

بتغرس ف هوايا حنين

ب كون وياها وب همسه

 ولا المسكين

بتهتف عالى وتفوتنى

بلهفه شوق مع الغايبين

بنبرة حزينة واستنى

اقول ياانين

وقلبى الشارد يلمحنى

 تقولش سجين

تدور فيا دروب بكرة

معاد يمكن يكون فكرة

بيرجع غالى وبتهنى

بقلب سليم

بتتحشرج اهاتى بروحى

وبتعصر ملح ف جروحى

مابين ذكرى تقول تايهين

وروحى تروح وتتحسر

على احلام ما تتفسر

وتتكسر مع الغايبين

وطيف فقدانهم المجنون

يلاحقنى بكل ظنون

كأنى برسم اللوحة

على جروحى وزمن نوحه

اهات ثابته بكل فنون

واى هناك يصبرنى على

العطر اللى بستناه

يجينى يفوح بحنية

اقول ياحياه

وبين رمشى ونن العين

اتوه وياه

وبلسم جرحهم غالى

 وأغنى بشوق ويحلالى

ك قمره ف ليالى العيد

احس معاها فجر جديد

تقرب عطرهم دانى

ويبقى فجرهم سارى

مابين قلبى ونبض وليد


 .

الأحد، 2 أكتوبر، 2011

اعاتب فيك قلبى



اعاتب فيك قلبى

كيف ملكتة وملكت احساسى الجارف

المشتاق لك دوم
  

اعاتب فيك ظنى

كيف جعلتنى اهيم بك حبا

واظن انك حبيبا دائم الصدق والاحساس

اعاتب فيك روحى

كيف هامت ومالت وانستنى من حولى
احلام وامال كثيرة

وكأنك انت وحدك وجودى ومملكتى الهادئة


اعاتب فيك حبى

كيف احببتك الى هذا الحد

جعلتنى انسى نفسى

بوجودك احس نبل الحياة الجميله

ولذه طعمها الرائق الصافى الدافىء

اعاتب فيك عينى

فلا وجود لغيرك بين جوانحى واحلام يقظتى

اعاتب فيك  فرحة عمرى
فانت فرحتى وحنانى ...انت فرحة ايامى


انت كل شيىء فى حياتى


فأجبنى حبيبى

 أأعاتب فيك نفسى

ام اسرح معها فى ملكوت حبك ؟
  

)))))))))))))))))))))))))))))))))))))))))))))))))))))))))))))))))))))