السبت، 30 مايو 2015

ف الخيال



اه ياسلام لو يوم سرحت

 وف الخيال

وقلت اشوف وياك امل

واسرق حياه ومن غير تعب

وسرحت نوبه وقلت هقدر

 اخطفك

جوايا نبع ونور بشايره

 تحلفك

تسبق نجومى وسكتى

اغزل بحبك دنيتى

تعشق ترفرف الف كلمه

 بشمعنا

تشعل وتنسج شوق شفايفه

 مسلمه

واسمع رنين العود يدغدغ ف الخيال

سحر المحبه المستبده بالامال

واسرح اقولها بقلب عايش سكتك

اااه ياسلام

لو يوم غرقت ف دنيتك
ــــــــــــــــــــــــــــــــــــــ

السبت، 23 مايو 2015

بعيش فرحه




يااحلى كلام مع الايام

 رسملى فى الهوى قصه

يقول ويعيد بأحلى وعيد

 ورمش العين مايتوصى

رسمتك شوق

 وف عيون الامل وبدوق

سعاده وفرح بالرصه

يااجمل حلم ف عيونى

وف جبينى لهواك مرسه

على خدودى

 وفوق عودى

بتتمايل 200 فرحه

بتنهيد السهر والليل

 وبالمواويل

بتحلى عيونى  واهى شرحه

بغنوايه معدية وف ايديا

بأحضن زهر ايامى واحلامى المنديه

وبغزل م الهوى مركب

وافجر زهرى واسرسب

ف ازهارى ولجل الحب ماهدارى

واقولها ف قلب مشوارى

 انا لجلك بعيش فرحه
انا لجلك بعيش فرحه

السبت، 16 مايو 2015

اهات الوجع

 
الشوق دا مات
 والحنين

عدى هنا بداله

صحى اهات الوجع
 والقلب يحلاله

احساسه مؤلم اكيد
 سارقنى لملامه

وبَذل رغم الاسى
 ساحبنى قدامه

حنينى رغم الفراق
ثاير بحنية

ينده على اللى راح
مايفوتنى وحديه

مش عارفه ليه الفراق
اوقاته محسوبة

هو الزمن نساى
ولا الامل عيبه

حنينى موجه انجرف
لخبط زمانى وراه

لما المزاج انحرف
 سرحت قلت الاه

لا قافيه نفعت فيه
 ولا حرف قال يانجاه

وقلمى حبره داب
من قسوتين وعتاب

رسايله اهيه مبهمه
مشاورها لحن وضيق

عَزفِت غناوى الضنى
هيمانه جوة طريق

غمضت عينى معاه
 وعيونى عشمانه

احضن ب ايدى الوجع
وشموعى غرقانه

وحيدة..اشكى حنين..


واسمع حفيف لشجار..

ويا هفيف الهوى.


شايل معاه اسرار


مجداف يجر الحنين

متعلقه بافكار

يطرب هوايا رنين

واسكت اقول ... محتااااااار




السبت، 9 مايو 2015

حلم


حلم وبرىء

طول عمره طاير ف السما

يغزل غناوى المشتاقين

من وسط كلمه حنينه

سايب ايديه

لجلن ما يحمى ضهرنا

شايل على كتافه الضنا

شايل دموع اللى انكوى

حلم وجالب دمعته

م اللى انطوى

راجع اكيد هيقول يعيد 

من وسط شمعه اللى استوى

مر ومرار ولا فيه انتظار

غير لما يسكت يختفى

صوت اللى صار ويا غروره 

وينطفى

يمكن صبايا عمرنا 

تقدر تطول 

امله اللى ظاهر فجر طارح

ف الشروق

بكل الفروق يظهر يدوق

طعم المحبه ف قلبنا

ماهو لجلنا راجع يغنى حلمنا 

ف وسط السما ..........

السبت، 2 مايو 2015

عودة التاااج

هذا التاج اهداء من الاخت الغاليه قمر وليل واشكرها لزوقها جدا واتمنى انى اقدر اتواصل مع موضوع التاج بصراحه اول مرة واتمنى تكون اجاباتى ومعلوماتى سلسه بسيطة للمتابعين وشكرا لكل من مر من مدونتى المتواضعه وميرسى ياقمر لأتاحه الفرصه الجميله دى ليا والشكر موصول قبلها للاستاذ جمال ابو العزصاحب اول تاج.

1/ ﻣﺎﺫﺍ ﺗﻤﺜﻞ ﻟﻚ ﻣﺪﻭﻧﺘﻚ ؟
مدونتى هى متنفسى لنقل مشاعرى الخاصه بالعاميه المصرية واحسبنى شاعرة للعاميه .. ومبسوطة جدا لانى اتعرفت من خلالها على اخووه واخوات فى قمة الذوق والادب ربنا يديم الود بينا

ﺱ2/ ﻣﺎﺫﺍ ﺗﻤﺜﻞ ﻟﻚ (ﺗﻌﻠﻴﻘﺎﺕ ﺍﻟﻤﺪﻭﻧﺔ) ؟ ﻫﻞ ﻫﻰ ﺃﺳﺎﺳﻴﺔ ﺃﻡ ﺗﻜﻤﻴﻠﻴﺔ ﻓﻰ ﻭﺟﻬﺔ ﻧﻈﺮﻙ ؟
التعليقات عندى هى التقويم الاساسى لكتاباتى .. ومن خلالها التعارف بيكون جميل بين اصحاب المدونات وفلسفتهم المختلفه .

ﺱ3/ ﻫﻞ ﺃﺭﺩﺕ ﻳﻮﻣﺎ ﺃﻥ ﺗﻜﺘﺐ ﻓﻰ ﺷﺊ ﻭﺧﺠﻠﺖ ﻣﻨﻪ ؟ ﻣﺎ ﻫﻮ ﺇﻥ ﻛﺎﻥ ﻳﻤﻜﻨﻚ ﺫﻛﺮﻩ ؟
بصراحه كتاباتى الرومانسيه وما اكثرها كنت من النوع الى بيخجل كثير فى نشرها من خلال المنتديات الادبيه اللى كنت بنتمى لها او على الفيس .انما مدونتى لقيت متنفس جميل علشان اكتب الرومانسية براحتى , وطبعا دا علشان طابعنا الشرقى ونظرة الاخرين للانثى وانها لو مجرد انها كتبت رومنسى يبقى علشان عايشة نفس التجربة ودا مش صح فى كثيرا من الاحيان لان المشاعر موجوده والاحاسيس كمان والشاعر بيحب يعبر بسرعه بقلمه عن ما يجول بالخواطر

ﺱ4/ ﻫﻞ ﻛﺘﺒﺖ ﺷﻴﺌﺎ ﺣﺪﺙ ﻟﻚ ﻭﻟﻜﻦ ﺑﺄﺳﻠﻮﺏ ﺗﻮﺭﻳﺔ ﺃﻯ ﻟﻢ ﺗﺬﻛﺮ ﺃﻧﻪ ﺃﻧﺖ ؟ ﻭﻫﻞ ﻛﻨﺖ ﺳﻌﻴﺪ ﺑﺎﻟﺘﻌﻠﻴﻘﺎﺕ ﻋﻠﻴﻪ ﺃﻡ ﻻ‌؟
اكيد حصل كثيرا وخصوصا فى قصايدى الذاتيه اللى بتتكلم عن نفسى بتكون حقيقة بتعبر عن مشاعر وقتيه ,انا بسعد بكل تعليقات اخوانى واخواتى ويارب دايما .

  5/ ﺃﻛﺜﺮ ﺷﺊ ﻳﺴﻌﺪﻙ ﻓﻰ ﻋﺎﻟﻢ ﺍﻟﺘﺪﻭﻳﻦ ؟ ﻭﺃﻛﺜﺮ ﻣﺎ ﻳﺤﺰﻧﻚ ﻓﻴﻪ ؟
عالم جميل يجمع بين الاخوة والاصدقاء وبين فلسفتهم الشخصية والاطروحات الراقية .. والعيب اللى فيه فعلا انشغال البعض الا ما رحم ربى فى الفيس وهجر التدوين .. وياريت نعمل حاجه جماعيه زى مووضع التاج كده ويتبناه احد الشباب للدعوه من خلال المدونات او الفيس لعودة الجميع لمدوناتهم سالمين ياريت اتمناها بجد

ﺱ6/ ﻗﻢ ﺑﻌﻤﻞ ﺇﺷﺎﺭﺓ ﻟﺨﻤﺲ ﻣﻮﺿﻮﻋﺎﺕ ﻗﺪﻳﻤﺔ ﻋﻠﻰ ﺍﻷ‌ﻗﻞ ﻓﻰ ﻣﺪﻭﻧﺘﻚ ﺗﺮﻳﺪ ﺇﺣﻴﺎﺋﻬﺎ ﻣﻦ ﺟﺪﻳﺪ ؟
اوقات كتير بعمل كده فعلا لبعض قصايدى المحببه الى نفسى او فازت فى بعض المسابقات الشعرية

       ﺱ7/ ﻧﺼﻴﺤﺔ ﺃﻭ ﻛﻠﻤﺔ ﻣﻮﺟﺰﺓ ﺗﺮﻳﺪ ﺃﻥ ﺗﻘﻮﻟﻬﺎ ﺑﺨﺼﻮﺹ ﺃﻯ ﺷﺊ ؟
مااجمل الثقه فى الله والتعايش مع اى الم تعيشه بالرضا والامل فى بكره


س8/موضوعات كتبتها وندمت على كتابتها؟
لا مافيش بتهيالى اى قصيده كتبتها وندمت لانها بتكون احاسيس ومشاعر وقتيه بعبر فيها عما يجول بالخاطر مش اكتر


س9/لمن تهدى هذا التاج؟
مش عاوزة احس انى بتقل على اى من اخوانى او اخواتى بس اتمنى ارسلها ل:
زهراء ,تركيب ,سعيد وحشه . محمد سلامه


كل الشكر لمتابعين مدونتى الكرام واتنمى انى اكون نجحت فى الاجابات ياقمر مساء الفل عليكم