الثلاثاء، 25 ديسمبر 2012

ما يهمكش




وما يهمكش من جرحى

مدام للدمع محتاجه

وما يهمكش من بعدى

مدام الخطوة  فراقه

انا جربت سهد الروح

 لقيتنى خلاص كما العاده

جميله وحيده بعنيا

 بشوقى حياتى مرويه

فسيبك منى وانت هناك

دا قرب الحزن باقى هلاك

ومين قالك
 هسيب الدمع ف عيونى

 ومين قالك
 انا فرطت ف ظنونى

دا جرحى هو جرح الطير

وكل ما اخطى أحس بغير

فراق البعد بيقرب

على احزان ما تتجرب

حياتى كلها ف عنيك

وكنت معايا ملك ايديك

خلاص الحيره اخدتنى

خلاص الحب موتنى

لازم اهرب ولا اتغرب

لازم القسوة تتسرب

ف جوايا بحس مكان

يميل يسرح سنين  قدام

اروح على بحر عالى الموج

ادوق وياه طباع الفوت

احس بموجه وخدانى

 تلف هناك وغرقانى

اغمض نبض احزانى

واغسل نزع وجدانى

فيمكن تيجى وف بكره

احلام للورد والذكرى

اشوف الفجر اهو طالع

يشقشق زهر ما يمانع

وبينور هناك عالى

 واشوفه نهار  و يحلالى

وهتغير وعمرى ما اغير

لحد طريقى اروح واميل

وتتغير طباع الكون

وتتغير دموع اللوم

امل عدى على قلبى

 اقوله وعمرى ما اخبى

علشان ترتاح وما تسال

وما يهمكش من  جرحى




السبت، 15 ديسمبر 2012

عبثا




 عبثا ما اسخط احيانا

على قطف ورودى المروية

واقطع نبضى مشتاقا

لوصال جروحى المنسيه

فحديثى لجلك موصول

لاكمل تلك الاغنيه

ولقلبك جسرى محمول

على نغمة شوق وديه

فترفق بالعطر السارى

الى دربك يحكى برويه

وتناسى خجلى من قربك

فحياتى بعدك منهيه

اسررت الى نفسى حديثا

لتكون اوقاتى مقضيه

ف لعمرك ما اهوى غيرك

ولصدك اصبحت ضحيه

امسيت اناجى هنا طيفك

واحدث ورد الجورية

مفتون  بك ويا حياتى

ولعينك دنيايا سويه
************

السبت، 8 ديسمبر 2012

هو فيه ايه ؟؟



اقلع ثوب الثورة وعاند

واياك حتى تقول نتساند

مصر بريئة من ثورتنا

وان كات حتى ف يوم قبلتنا

نعرض عرض بكل غرور

 ونقول واحد هم ودول

 انت المسلم وانا على يدى

 تكبر بينا وكله تحدى

سيبك يلا وروح اتخانق

وامسك مطوة وغز وسابق

علشان تسمع كلمه جريحه

 تصنع منا طباع شبيحه

 وافضل هاتى ف حب بلادى

 انت وارضى ننوح ياولادى

 صوتك يصرخ ف الميادين

عاوز كرسى ولا دورين

يانقسمها على الملايين

عيب على جهلك

 واسأل اهلك

بلدك حزن الهم ماليها

شاحب لونها وخافى عنيها

 اسكت حبه ياكاسر عرضك

حتى محرم ناسى لغرضك

شهر وحرمته جت من ربك

ادعيه بس وقول يامعين

يمكن يرحم دمعة ولدك
***********************

اللهم أصلح احوال مصرنا الغاليه
والف بين قلوب ابنائها
امين 

السبت، 1 ديسمبر 2012

همسة قرب




فى ناس ومن بعدها
ننسى الحنان والحب
وف لحظه نشتاق لها
نتمنى همسة قرب
ياللى الامان نسيتوه
اتهنوا وانسونا
قرب البعاد احزان
 لو حتى فتونا
يمكن اوان الفجر
شاهق ومن قربكم
وانا قلبى اصله صد
من يوم ما خنتونا
هون عليا الجرح
 تعب الجوارح شوق
شوفت المدامع فرح
صبره منين ما بفوق
بخاف اوى لو يوم
 غمضت انا عيونى
بحس طعم اللوم
والقسوه ف جفونى
شباكى نوره انطفى
 م الغز ف المواويل
ياللى عتابكم قسى
 شيلوا السهاد  والوويل
مشتاقه لحظة لقا
 بين النهار والشمس
ترجع غناوى الشجر
مرتاحه من غير همس
جرحى اللى عدى هناك
 قال دا الزمن ناوى
يهرب ومن غربته
لو حتى مداوى
ياللى فراقكوا مرار
 ما تحنوا وتجونا
اصل احنا باستمرار
 فاكرين وتنسونا ؟
ماهى ناس ومن بعدها
ننسى الحنان والحب
وف لحظة نشتاق لها
 نتمنى همسة قرب  

الأربعاء، 21 نوفمبر 2012

قلقانه عليك




ما تقولش لحد

انى ف بعدك 

قلقانه عليك

ولا نسمة شوق 

تسعد قلبى

من غير ما اراضيك

ياما الايام بعدوك عنى

لكن بحدود

ياما الاحلام اخدوك منى

 وف الاصل وعود

سيبك ياهجرنى من القسوة

 وتعالى اوام

انا المى بيوجع بكفايه

كتر الاوهام

سيبك م الفرحه 

اللى فى عينى

  انا اصلى بغير

اكمن جراحى ف ايامى

مش عايزة تطير

سلمتك قلبى ومفتاحه

مش عاوزة كلام

لو حتى النظرة ومعانيها

تقلب ل ملام




مايهمش برضو 

وما تقولشى


قلقانه عليك



الخميس، 15 نوفمبر 2012

غزة لن تموت




اليهود ف الغدر لمه


عمرهم عمر القرود

سعيهم ف الارض همه


لجل ما يشيلوا الحدود


غدرهم غدر العقارب 



مهما نادوا بالسلام

هم شر وسٍمه قادر 

يقلب الفرح لظلام

غزه حره مهما قالوا

عايشه بيكوم ياشباب



زيدوا فرح القلب صابروا



دافعوا عنها بالثبات


بكره راجع بالامل


نبض الشهيد 

لما فجر الصبح ينده 
ياشباب

انا يوم جديد



***************


كلمات بسيطه اهديها لاحبابنا فى غزة 


داعيه الله عز وجل ان يجعل غدر الصهاينه

 فى نحورهم ويعجل بالنصر امين

الجمعة، 9 نوفمبر 2012

ترحال




شايفه هناك ترحال 

وصحبه من اللايمين

بيقولوا هم كمان

 صابرين شهور  وسنين

صبر الهوى قاسى وقلوبنا مشتاقه

والفرح عدى وفات 

سابنا ولاالتايهين

مواكب الترحال

 زهقت وزهقانه

 من مُر خدنا زمان 

وقلوبنا عطشانه

كل الصعاب بتمر

 لكن بنتجرح

والحب قلبه مات

 ودروبنا غرقانه

كل القلوب بتحن

 للحب والاحزان

بس انت دوق الصعب

 لو حتى بالحرمان

تلقى ف شوق البعد

 محبه وفرحة روح 

تاخدك لزمن الود

 لو حتى بالفرمان

مواكب الترحال

 بتقولك استنى

انا قلبى كله امان

 بس انت أتأنى

سيبك من الاوهام

 لو حتى رنه خوف

العمر كله سلام

 وبصبره أتمنى