الثلاثاء، 31 يناير، 2012

وم الاخر


وم الاخر .....
أهى  دنيا 
وفيها كمان بنتاخر
علشان الفرحه تلمسنا
 وتهمس جوه ف نفوسنا
نروح أو نيجى  ترمينا
 على ا شواقنا تدفينا
ونرجع تانى ونروح
 نهون من تانى نتجرح
واه يانا
على الدوخة اللى  سرقانا
ماهى دنيا بتغوينا
 وم الاخر
بنتاخر لبعضينا
وجوه ف حلمها نعشش
و نبقى حطام ونتكرمش
 تصبرنا وتعصرناعلى الاخر
 وم الاخر
امل فيها عايش صرخه
يبوح يحكى على الفرحه
 نشيل الهم من تانى
 وقدامى
 وحتى وهى سرقانى
 تبات اوهام
ومش فارقه
تكون احلام
 معديه مخبيه
 سنين للعمرمنسيه
وبتداوى الام الفرقه
ف عنيا
وبتدور على اللى كان
ف احلامى وف اديا
 وم الاخر
 اهى دنيا
 تشيل وتحط ف قلوبنا
ودمع يخط مكتوبنا
 يدور بينا على مينا
تكون مرسى لامانينا 
وم الاخر هنا برضو
وتبقى دنيا سحبانا
 ولهيانا
وبرضو نعيشها نتصبر 
وبنفكر نقيد الشمع من تانى 
على فراقها 
ولا نطولها .... 
وتعصرنا على الاخر
وم الاخر..........أهى دنيا

الأحد، 22 يناير، 2012

فاتت سنه

فاتت سنه
 
  واحنا هنا متجمعين
دايما نطالب بالحنين
وبكل نقطه ف دمنا
لازم نشوف
كل الايدين الظالمه
علشان ما نقطع جدرها
علشان ما نكسر قلبها
ونقول كمان 
من غير سماح
ويا الجراح المره
الصابره ف شهدنا

فاتت سنه

وكل اللى فيها مَحزنه 
حتى المرار 
مرارته ساكنه ف قلبنا
كل اللى فاهم مننا ..
انت وانا ..
وكل الضنا 
لو يوم نبات
ويا السكات
ويا اللى فات
وعشش ف راسه انه هنا
عايشها لسه ف وسطنا
وكل لحظه ف حضننا
هنفضل كده ثايرين تمام
ويالكلام
ولا يوم ننام 
غير لما يزول من وشنا
ما اهو اصله غادر من زمان
حتى البيبان
سدت ف وشه الف عام
من غير ما تسال بختنا
عن جرحنا
بكره الجراح
تمحية ويرجع فرحنا
ويضمنا انت وانا
وان يومنا فات ويا السكات
ولسه سارق عمرنا
هنفضل كده ولا 100 سنه
نقعد نحايل ف الاهات 
ويا الثبات
لجلن ما يرتاح همنا
وترجع تلالى ف كل لحظة
شمسنا
وتضمنا انت وانا ....ِ
 
وفاتت سنه
************************************
 



الجمعة، 13 يناير، 2012

ياشـــــــوقـــــى جــــــــايـــــــــه



حسه قلبى كل مادا

مش بيفرح بالسعاده

كل شوق موجود ف دربى

قلبى سايبه ومستخبى

ياطريق مفروش جراح

قلبى عايش ب اللى راح

ذكرياتى كلها سكة اهات

روحى صبره ساكته

ف حضن الثبات

اه يافرح لمنى

طب طب عليا

قبل  عمرى ما يهرب

بالاقسى
 من بين ايديا ..........

حسه روحى بالهوى

دافيه وعفيه

غاوية اداوى بالنوا 

فرحة عنيا

ِشايفه فوق بر الجراح

نبرتى  حلوه وشقيقه

شده نفسى للبراح

 بالهنا ياشوقى جايه



**********************************************

الاثنين، 2 يناير، 2012

الفراق

لو يوم فقدت المشاعر

يبقى الامان راح منك

وان يوم خسرت الحبايب

يبقى الدفا غاب عنك

معرفش ليه الحنين

 سارق خطاوينا

لما الامان يلمحه
 يجرى قوام بينا


نتبع خطاوى الفراق

وف صمت مدارى

نرحل نلم ف اساه

ف مكابره وتعالى

تشوف هدوئك وصمتك

تدمع عيونك تبوح

يتلاشى نبضه ف قسوتك

وبحزن قلبك يروح

شعورة مؤلم داخلنا

نقيمه ولا يغادرنا ؟

مرارته جوة السهاد

دايبه بتزيدك عناد

ياخدك فراقك ف نزهه


جميله بتفرد كنوزها

اماكن غريبه وحدودها

شواطىء بعيده بورودها

 تلون تكسر وترمى
كأنك ف مرمى التمنى 
كانك بادلت الحقايق
بسعاده ف قلبك ودايق
تحلق بروحك وتهدى 

نشوه تهز الخلايق

وبدمعة ف عينك بتدعى

ياريت ماترحل تفارق