الجمعة، 29 نوفمبر 2013

هيه هيه



فرحة الايام ف قلبى
 
هيه هيه

نشوة الاحلام ف عمرى

برضو هيه

قلبى طاف بيا ف ملامحى

زهزهت روحى ب جرحى

حسستنى بأنى عايش
 
حسستنى بأنى حايش

كل خطوه تدوب قصادى
 
شوقى شفها وكله عادى

م البدايه خت روحى

عشت بيها ايام جروحى

عودتنى على اللقا اكتر واكتر

عودتنى على الشقا جوه المقدر

اشوف بعادى ف السما دايما بيكبر

احس لهفه مخضره شجرى المبعتر

ياسمايا ويانجومى
 
قربى عمرى اللى راح

علمينى التقى ببسمة دموعى
 
ف لحظة سماح

شوقينى ارتمى ف نبع الامان

شوقينى يختفى غدر الزمان

احس بافراح الهنا تطبطب عليا

احس بعيون اللقا بتمحى
 
اللى بيا
 
يمكن احس وقتها باحلامى جايه

وتبقى جنبى بالامل

او هيه هيه....

الجمعة، 22 نوفمبر 2013

ياسارق نبضتين منى


ياسارق نبضتين منى

غيابك صبره جننى

اداوى الروح بتنهيده

 الاقى الشوق بيقتلنى

 ياسارق نبضتين منى

 رسمتك جوه نن العين

وشوفتك بسمه عل الخدين

 وجودك هو كل حنين

 وطيف الوجد تاه منى

 ياسارق نبضتين منى

سرقت الروح وتوهت معاك

 وقلت أسعد اكيد وياك

لكنك قاسى ليه ف هواك

 بطرفة عين تزوغ منى

 ياسارق نبضتين منى

شطوط الحلم بتمنى

وقلت ابعد ولا اتأنى

ولعيونك وبستنى

وكتر الشوق مجننى

 ياسارق نبضتين منى

راح افضل جوه منك روح

اناجى القلب وقت البوح

وسهد القلب منى يروح

ساعتها الكون يفوق سنى

ياسارق نبضتين منى

الجمعة، 15 نوفمبر 2013

بنكتب لمين ؟؟



قالولى ها تكتبت !!!وتكتب لمين ....؟


بنكتب لمصر اللى عايشه وابيه
 ومهما استكانت هتفضل عفيه
هترجع لخيرها وهى راضيه
 دى اصل الحكايه ورمز الكفاح

 بنكتب لحضن السلام الامين
 ينور بروح المحبه السنين
نغنى ونرفع شعارنا المبين
عشان بكره يرجع بنوره المباح

 بنكتب لفجر النهار البعيد
 ينور شعاع المحبه السعيد
 يرجع كلامنا ولو كان عنيد
 وبستانا يطرح موده وسماح

 بنكتب محبه وفرح وسلام
 بنكتب لشهد اللقا والكلام
نصبر قلوب الغلابه بهيام
نحول شراع السفينه لنجاح

بنكتب لصبر الليالى الوحيده
 وهنعبر بلحظة لقانا الفريده
نلم الايادى ونرسم جَريده
 وننشر عليها نشيد الصباح

 بنكتب لابنى وابنك كمان
 وطبع القساوة يروح م المكان
 نقرب ما بينا نقول ياما كان
وزهر الموده هيطرح فلاح

الأحد، 10 نوفمبر 2013

هو وهى



تعامل وساجل

وست وراجل

بتحلى ما بينهم

حياة الأهات

بتمشى السفينه

ولو فى الجنينه

تحس الموده

وكترالمشده

وكله ف سكات

تقوله عيشتنا

هتخلق ف بيتنا

محبه وحنان

يرد عليها

دا اصل الحكاية

وهى الروايه

وحلمك جنان

تشوفهم ف شارع

ما تخلص مواجع

ما بينهم وبينه

بكل اللغات

وجوه المشاغل

بتشعل مشاعل

وكله ف ضغينه

لحد الممات

ياعينى ياحوا

وجودك بقوة

بيخلق حاجات

مادام لسه ادم

بروح المجادله

هتبقى الرايات

وا دى حياتنا

ولازم هنرضى

ياأدم ياحوا

بكل الثبات

الجمعة، 1 نوفمبر 2013

جرحى بكا


الصبر منى اشتكا

 والمر منى ذاب

 اكمن جرحى بكا

واهو فاتلى شوق وعذاب

 ساهر ياقلب الشوق

باقى ف افكارى

لُون الطريق مفروق

 والعتمه مشوارى

شجر اللمون ارتاح

 هايم ف لياليا

نطق المرار افراح

ساب حكله ف عنيه

 ماشى انا ف حالى

غارق ف بحر الشوق

بنده بافكارى

 قلبى صبح مسروق

 عايش بصرخه روح

 نبعه ولا الميه

 صافيه منين ما بروح

ملكاها باديا

 امانه يابكره

حنن عليا الحال

راضى انا ومجروح

 وجرحى صبح غيه