جرحت القلب

وجرحت القلب وكان راضى

وبصدك وقتى ما فات عادى

حسيت بالقسوه هنا ف بعدك

غيرت حلاوة اعيادى

كان ايه اللى رماك على شطى

خلانى اتشد ومابيدى

انا شوفت الود وبعيونى

والحلم معاك شوقى ووجدى

كان قبلك قلبى دا كان فاضى

و سمايا ونجمه جدار هادى

بينور قلبى و على قدى

اسرحبه ويومى يفوت عادى

ايامى رسمها ف احلامى

وياك انغام تيجى ف منامى

 بتغنى افراحى وشيلالى

بسمات حلوة كتير ف سلامى

لكنه اتغير واتبدل

ف هواك السهد مايوم يسدل

 اشواق البعد اللى رمانى

على نار اوهامك واتبهدل

قلبى اللى ب جرحك صديته

ماخلاص ارتحت وخبيته

من كتر قساوتك يامنايا

كسّرت الغدر وعديته

أنتظار

فاتت سنين
قلبى اللى ساكن ف الحنين
عايش حزين
يبدر اهاته ف الوجع
كترالقساوة ف الضلوع
مش قادره تنسى م الخضوع
ولاقسوة الماضى  بتاخد حظها
عمر الغرام ما ف يوم يرجع ضيها
شبح الضباب شايفينه دايما من بعيد
غادر عنيد
روح الخناق والاشتياق
مليا الصوابع كلها
حتى القلوب صبحت حجر
بتدارى دايما وشها
وف حضنها
دمعه حزينه معكره
ف صفو الزمن
كل البشر
وان كان ملايكه منورين
لا ف يوم كلامهم بالحنين
راح يسبل القلب الحزين
حسه مرار السهد
فوق عرش الزمن
ساكن ضبابه بلهفته
ولا حتى يوم راح يحتمل
كتر الجراح سكنه بتحصد شرها
جوة الاهات مُره مرارة غرسها
اه ياألم
لملم جراحك يلا وارحل من هنا
صبرى قليل
عمرى ما برتاح منه انا
عمر الغرام وللا الهيام
ماف يوم هيحموا ضهرنا
وان يوم حاولنا بجهلنا
راح تفضل الضحكه المريره
ف حلقنا
بتضمنا بتقول وتنعى ف حظنا
كتر الاهات سكة وجع
بتقول وتحكى ف غلبنا
اه ياوجع
ماتسيب غناوى حضننا
ترجع الفرحه الجميله تلمنا
حاسب هنا
على صوت كلامى وخطوتى
عمر الشروق مافيوم يدوق
غير الانتظار منى انا .
غير الانتظار منى انا.................

رجع الاوان

رجع الاوان

والقلب فارد سكته

 صبر بامان

مشتاق يقدم خطوته

رضا بإنسجام

شايل على جناحه الامل

بستان حنان

فرحان وبهجة شمعته

قادت كمان

قُرب الكريم

 شًوق دموعنا وحبنا

 لطاعه بإيمان

رمضان ياناحت ف القلوب

عزم الصديق

نغزل بشهد محبتك

نور للطريق

نبع الهدايه م الاله

 منجى الغريق

يسبح بروحه ومهجته

يطلب رضاه

ع الشط يلقى محبته

 وتصبح حياه

مستنين كرمك بلهفه مصدقين

وعد الحبيب

جنه ورضوان رحمتك 
سابقه الزمان

شهر وكتر محبتك
 زاينه المكان

يارب تقبل دعوتى

 بقلبى العليل

تصلحلى حالى ودنيتى

واكون ذليل

بطاعه تِدوب عسرتى

مانت النجاه


بقدوم ليالى رحمتك
 ونقول كمان

رجع الاوان
**************************


كل سنه والامه الاسلامية بكل خير وسعاده فى ظل شريعتنا السمحاء 


ونسأله سبحانه ان يبلغنا رمضان بفضله وكرمة ونحن فى احسن حال واروق بال 
اللهم امين