الصورة

الصورة ليه بهته

 وعيونى عشقاها

 ملامحها مش ثابته

 والقلب جواها

 شايفاها تتمايل

 والروح بتتحايل

 تسرح وتيجى هناك

 تتمنى تتساير

 ابص واستنى

 ألمحنى ف حماها

 بسمع ف ناس بتغير

 والدنيا لهياها

 اقول يانفس وليه

 الحيرة من صورة

 تقول دى اصل غيوم

 ف القلب محفورة

 خليك كده برة

 هتشوفها مغيورة

 دى الصورة من جوة

 تملى مبتورة

 هتلاقى بهاتانها

 يدى ل100 صورة

 واصلح بقى حالك

 تلقاها معدوله

ع الشط

ع الشط وغنيت اغنيه 

 وهستنى ف ايام ملاغيه

تيجى وطب طب على جرحى

 و تمسحلى الدمع بحنيه 

البحر الهيمان على شطه

وعيونى وقمرى اوام خطوا

والقلب السارح ف كلامى

هيقول ويحب عشان خاطره

الخاطر سابح ف ايامى

ومايحَلى العمر الا غرامى

ولا يوم هتمنى انول غيره

وبقول وبناجى ف اوهامى

صَورتك ف العمر حكايه

ورسمتك غنوه ف ضلايه

وهعيش ايام تحكى بشوقى

وهبوح للعالم بهوايا

تعلالى وبدل ايامى

واسرق من العالم احلامى

والسعد ينور ف سمايا

والشط اهو ثبت  أ قدامي

&&&&&&&&&

الجراح

كل الجراح المرة غادرت للمكان

هَجرت لقلبى ويا اشواق الحنان

عدت على شهد الليالى المغرمه

ندهت لفرح حبى بتاع زمان

كل الجراح المرة ندهت خطوتى

قالت كلام النبع خضر غنوتى

شوق الهوى ويايا زهره كان لمون

شبع الغرام منى وكان لطبعه فرحتى

كل الجراح المره قالت كلمتين

نورت روح الليالى المحرومين

عزفت على اوتار المحبه لحنها

فتتت صبرى اللى شاهق بالحنين

كل الجراح المره دوقت لطعمها

غرست بسهد الدمع نصل بجرحها

شمع افراحى دا بدل شكوتى

ورجعت تانى اغزل خطاوى لطبعها

**********************